26 avqust 2011 12:24
İnter Gürcüstanda ilk məşqə çıxdı
Xəbər verdiyimiz kimi, "İnter" çempionatda yaranmış qısa fasilədən istifadə edərək təlim-məşq toplanışı keçirmək məqsədilə Gürcüstana yollanıb. Azerisport.az xəbər verir ki, Tiflisin "Beaumonde Garden" otelində məskunlaşan komanda ötən gün axşam məşqinə çıxıb.
1 saat 30 dəqiqə davam edən məşq prosesində futbolçular isinmə hərəkətlərindən sonra fiziki məşğələlərlə yanaşı, topla davranış və qısa ötürmələr üzərində çalışıblar.
Təlim-məşq toplanışı çərçivəsində "İnter" avqustun 25-də axşam Avropa Liqasının pley-off mərhələsi cərçivəsində "Dinamo"(Gürcüstan) – AEK (Yunanıstan) komandaları arasında keçirilən maraqlı qarşılaşmanı da izləmək imkanı qazanıb. Hansı ki, ötən mövsüm “bankirlər”in şərəfini qorumuş gürcü futbolçu David Odikadze hazırda "Dinamo" komandasının üzvüdü və dünən keçirilən qarşılaşmada iştirak edirdi. Lakin keçmiş komanda yoldaşlarının dəstəyi də Odikadzeni sevindirməyib. Cavab qarşılaşması 1:1 hesabıyla başa çatıb və yekun nəticəyə əsasən növbəti mərhələdə AEK mübarizə aparacaq.
