29 avqust 2011 15:26
Belçikalılara Bakı səfəri öncəsi daha bir şok
AÇ-2012-nin seçmə mərhələsi çərçivəsində millimizin rəqiblərindən olan Belçika yığması Azərbaycanla Bakıdakı oyunda aparıcı futbolçusu Tomas Vermalenin xidmətindən yararlanmaya bilər. Azerisport.az xəbər verir ki, buna səbəb London “Arsenal”ının üzvünün topuğundan aldığı zədədi.
O, bu zədəni UEFA Çempionlar Liqasının “Udinese” ilə oyununda alıb və hazırda müalicə alır. Belçikalı futbolçu bu üzdən dünən keçirilən İngiltərə Premyer Liqasının “Manchester United” ilə oyununu da (2:8) buraxmalı olub.
Belçika yığmasının baş məşqçisi Jorj Leekens böyük ehtimalla Vermaleni Bakıda da meydana buraxa bilməyəcək. Xatırladaq ki, sözügedən futbolçu martın 29-da Brüsseldə keçirilən görüşdə də eyni səbəbdən meydana çıxa bilməmişdi.
Azərbaycan – Belçika matçı sentyabrın 2-də Tofiq Bəhramov adına Respublika stadionunda keçiriləcək.
