29 avqust 2011 11:29
Millimizin üzvləri son turda: Foqtsun seçimi
Sentyabrın 2-də Bakıda AÇ-2012-nin seçmə mərhələsində Azərbaycan və Belçika yığmaları üz-üzə gələcək. Azerisport.az xəbər verir ki, millimizin baş məşqçisi Berti Foqts bu oyunlara 23 futbolçu çağırıb.
Bu üzdən biz rəsmi oyun ərəfəsində milli futbolçularımızın klublarındakı son oyunları ilə bağlı kiçik araşdırma apardıq. Həmin araşdırma ilə sizi də tanış edirik. Görək, yığmamızın üzvləri Belçika ilə çətin oyun öncəsi nə dərəcədə yaxşı formadadı?
Qapıçılar
Qapıçılar
Kamran Ağayev (Xəzər Lənkəran). Bütün oyunu meydanda oldu, bir qol buraxdı. Xüsusi nə iləsə fərqlənmədi. Klubu isə heç-heçəyə razılaşdı.
Andrey Popoviç (Sumqayıt Şəhər) və Aqil Məmmədov (Bakı) oynamadı.
Müdafiəçilər
Rəşad Sadıqov (Qarabağ), Rail Məlikov və Ruslan Əmircanov (hər ikisi “Neftçi”) 90 dəqiqə meydanda olsa da, klubları məğlubiyyət acısı daddı. Əmircanov sarı vərəqə ilə də “fərqləndi”.
Saşa Yunisoğlu və Vurğun Hüseynov (hər ikisi “Qəbələ”) da 90 dəqiqə mübarizə aparmaq şansı qazandı. Komandaları isə bu oyunda qələbəni bayram etdi. Hüseynov sarı vərəqə almaqla da diqqət mərkəzinə düşdü.
Aqil Nəbiyev (AZAL) cəmi 5 dəqiqə oynayıb və zədələnmək məcburiyyətində qalıb. Komandası qələbə qazanıb.
Elnur Allahverdiyev (Xəzər Lənkəran) meydana çıxmayıb.
Yarımmüdafiəçilər
Aleksandr Çertoqanov (Qəbələ) və Rahid Əmirquliyev (Xəzər Lənkəran) 90 dəqiqə meydanda olub.
Ruslan Abışov da (Neftçi) bütün oyunu meydanda olmasına rəğmən, sarı vərəqə alması ilə “fərqlənə” bilib.
Rəşad Sadiqov, Namiq Yusifov və Əfran İsmayılov da (hamısı “Qarabağ”) bütün oyun ərzində komandasına kömək edib. Sadiqov ikinci sarı vərəqə ilə meydandan qovulmaqla yadda qalıb. İsmayılov zədədən sonra hələ də ideal forma yığa bilməyib.
Mahir Şükürov (Qəbələ) diskvalivikasiya olunduğundan oynamayıb.
Ufuk Budaq (Freiburg, Almaniya).
Hücumçular
Elşən Məmmədov (AZAL) bütün oyunu meydanda olub, iki qol vurmaqla matçın qəhrəmanı olub.
Rauf Əliyev (Qarabağ) və Branimir Subaşiç (Xəzər Lənkəran) bütün oyunu meydanda olub. Əliyev fəallığı ilə seçilsə də, nə o, nə də Subaşiç qol vura bilib.
Vaqif Cavadov (Volqa, Rusiya) 68-ci dəqiqədə meydana çıxıb, komandası qələbə qazanıb.
Murad Hüseynov (Qəbələ) əlavə olunmuş dəqiqələrdə meydana çıxıb, özünü göstərmək imkanı qazanmayıb.
Göründüyü kimi, yığma üzvləri son oyunlarında kifayət qədər fəal olublar. Düzdü, onların əksəri milliyə heç də yaxşı əhval-ruhiyyədə gəlməyiblər. Hər halda Berti Foqtsun onları millinin oyununa necə kökləyəcəyi maraqla gözlənilir.
