30 avqust 2011 14:00
Ruslan Abışovla Orebro ortaq məxrəcə gələ bilmir
Azərbaycan millisinin, eləcə də “Neftçi”nin müdafiəçisi Ruslan Abışovun İsveçin “Orebo” klubuna keçidi dünən həllini tapmalıydı. Azerisport.az xəbər verir ki, tərəflərin bir-birinə təklif etdiyi müqavilə şərtləri qətiyyən xoş olmadığından, hələ də razılıq əldə olunmayıb.
Bu üzdən də İsveç klubunun rəsmiləri bu gün növbəti dəfə futbolçunun agenti ilə görüşüb danışıqlar aparacaqlar. Keçidin də məhz bu gün həllini tapması gözlənilir.
Xatırladaq ki, “Orebro” futbolçumuza hazırda “Neftçi”də qazandığından 2 dəfə az qazancla 4,5 illik müqavilə təklif edir ki, qarşı tərəf də bu şərtlərin müəyyən qədər yaxşılaşdırılmasına nail olmaq istəyir.
Sonda onu da vurğulayaq ki, sabah Avropada transfer pəncərəsi bağlanacaq.
