31 avqust 2011 13:40
Qarabağın qənimi də Bakıya gətiriləsi olmadı
AÇ-2012-nin seçmə mərhələsi çərçivəsində sentyabrın 2-də Bakıda millimizin qonağı olacaq Belçika yığması daha bir itki ilə üzləşib. Azerisport.az xəbər verir ki, baş məşqçi Jorj Leekens bu dəfə də hücumçu problem ilə üzləşib.
Belə ki, rəqib komandanın ön xətt oyunçusu Byorn Fleminks də millimizlə qarşılaşmanı buraxmalı olacaq. Buna futbolçunun zədəsinin tam sağalmaması səbəb olub. Belçika seçməsinin baş məşqçisi Jorj Leekens də Fleminksin qarşıdaı matçda komandasına kömək edə bilməyəcəyini təsdiqləyib:
“Fleminksin ayağında yüngül ağrılar var idi. Hücumçu Azərbaycana qarşı oynaya bilərdi. Ancaq mən onunla bağlı risk etmək istəmədim. Ona görə də Fleminksi “Brugge”nin düşərgəsinə geri göndərdim”.
Qeyd edək ki, bu futbolçu Avropa Liqasının üçüncü təsnifat mərhələsinin ilk oyununda “Qarabağ”ın qapısına yol tapmışdı.
