1 sentyabr 2011 14:23
İngiltərə millimizlə oyuna altı itki ilə çıxacaq
Bu gün AÇ-2013-ün seçmə mərhələsi çərçivəsində Azərbaycan millisini qəbul edəcək İngiltərənin gənclərdən ibarət yığması daha iki itki ilə üzləşib. Azerisport.az xəbər verir ki, britaniyalıların baş məşqçisi Stüart Pirs Emmanuel Frimponqla Martin Kellinin də xidmətindən yararlana bilməyəcək.
Qeyd edək ki, müvafiq olaraq “Arsenal” və “Liverpool”un şərəfini qoruyan hər iki futbolçunun millimizə qarşı oynaya bilməməsinə zədə səbəb olub. Xatırladaq ki, bu, İngiltərə millisində ilk itkilər deyil. Frimponqla Kellidən öncə Kayl Uelker, Denni Uelbek, Coşua Makikran və Natan Beyker də sıradan çıxmışdı. Lakin son iki futbolçunun meydana çıxmaq şansının olduğu bildirilir.
İngiltərə - Azərbaycan görüşü bu gün Uotfordakı “Vikarec Road” stadionunda keçiriləcək. Bakı vaxtı ilə saat 23:30-da start götürəcək qarşılaşmanı Xorvatiyadan olan Domaqoy Vuçkov idarə edəcək.
