Qvineya millisinin üzvü rəsmən Neftçidə

"Neftçi" daha bir transferi reallaşdırıb. Azerisport.az xəbər verir ki, paytaxt klubu qvineyalı futbolçu Kanfori Silla ilə müqavilə bağlayıb.

 

Müqavilənin şərtlərinə görə, oyunçu 10 gün müddətində məşq proseslərində özünü yaxşı tərəfdən göstərsə, müqavilə avtomatik olaraq qüvvəyə minəcək.

 

Qeyd edək ki, 31 yaşlı yarımmüdafiəçinin sonuncu klubu "Etual de Qvineya" olub. Silla bundan əlavə, "Şarlerua" (Belçika, 2001), "Erqotelis" (Yunanıstan, 2001-2004), "Kallitea" (Yunanıstan, 2004-2006), "Sivasspor" (Türkiyə, 2006-2007), "İstanbulspor" (Türkiyə, 2007-2009), "Konyaspor" (Türkiyə, 2009-2010) klublarında çıxış edib. O, 2004-cü ildən dəvət aldığı Qvineya milli komandasının heyətində 38 oyun keçirib və Afrika Millətlər Kubokunun yarımfinalçısı olub.

 

Sonda onu da əlavə edək ki, "Neftçi" bu futbolçu ilə yenidən sıralarına qaytardığı sabiq oyunçuları - Tural Nərimanovla Fərid Quliyevin də adını Peşəkar Futbol Liqasına təqdim etdiyi iştirak ərizəsinə daxil edib.