2 sentyabr 2011 14:15
Bakı 9 futbolçusunun xidmətindən məhrum olub
“Bakı”nın 9 futbolçusu dünyanın 7 milli komandasının düşərgəsinə yollanıb. Azerisport.az xəbər verir ki, qapıçı Aqil Məmmədov millimizin bu gün keçiriləcək Azərbaycan - Belçika və sentyabr ayının 6-da Qazaxıstanla ev oyunlarına dəvət edilib.
Komandanın baş məşqçisi Aleksandr Starkov və futbolçuları Denis İvanovla Maris Verpakovski Latviya milli komandasının şərəfini qoruyacaqlar. Qeyd edək ki, Latviya millisi AÇ-2012-nin seçmə mərhələsi çərçivəsində Gürcüstan və Yunanıstanla qarşılaşacaq.
“Zolaqlılar”ın daha bir üzvü Deyvidas Cesnauski Litva milli komandasının heyətində Lixtenşteyn və Şotlandiya ilə keçiriləcək oyunlara hazırlaşır.
Moldova milli komandasının əvəzolunmaz üzvləri Aleksey Savinov və Vadim Borets isə Finlandiya və Macarıstanla, İbrahim Karqbo isə Misirlə keçiriləcək oyunda meydana çıxa bilər.
“Bakı”nın daha bir hücumçusu Uinston Parks yenidən milli komandadan dəvət alıb. O, ABŞ və Ekvadorla keçiriləcək oyunlara hazırlıq məqsədi ilə Kosta Rika millisinin düşərgəsindədi.
Gənc müdafiəçimiz Novruz Məmmədovun isə 21 yaşlılardan ibarət milli komandanın heyətində Belçika ilə oyunda meydana çıxması gözlənilir.
