2 sentyabr 2011 19:14
Beşiktaş – Maccabi oyunları keçirilməyə bilər
Avropa Liqasının iyulun 15-də İstanbulda keçirilməli olan "Beşiktaş" (Türkiyə) - "Maccabi" (Təl-Əviv, İsrail) baş tutmaya bilər. Azerisport.az xəbər verir ki, buna səbəb Türkiyə ilə İsrail arasında yaranan siyasi qalmaqaldı.
Belə ki, Türkiyə bu gün İsraillə bütün diplomatik və hərbi əlaqələrini dondurduğunu açıqlayıb. Xarici işlər naziri Əhməd Davudoğlu İsrailin "Mavi Mərmərə olayı"na Türkiyədən üzr istəməyəcəyi və Qəzza zolağındakı blokadanı qaldırmayacağı halda əlaqələrin bərpa olunmayacağını bildirib. Nazir həmçinin qeyd edib ki, hər iki ölkənin səfirləri yaxın günlərdə ölkələrinə yollanacaqlar.
Bu səbəbdən "Beşiktaş" - "Maccabi" oyununun keçirilməsi təhlükə altına düşüb. Oyunun hansı şəraitdə keçiriləcəyi, ümumiyyətlə baş tutub-tutmayacağı bilinmir.
Məsələ ilə bağlı açıqlama verən "Beşiktaş"ın vitse-prezidenti Metin Keçeli 15 sentyabrda "İsmet İnönü" stadionunda baş tutacaq oyunun hazırlıqlarını davam etdirdiklərini bildirib: "Xarici İşlər Nazirliyindən bununla bağlı bizə heç bir qərar göndərilməyib. Həm polis, həm də biz oyunla bağlı gərəkli təhlükəsizlik tədbirlərini görəcəyik. Təbii ki, hadisələrin inkişafını diqqətlə izləyirik. Əgər proseslərdə hansısa bir dəyişiklik baş verərsə, Xarici İşlər Nazirliyinin bizə verəcəyi tapşırığı yerinə yetirəcəyik".
Klub rəsmisi 1986-1987 mövsümündə Cənubi Kiprin APOEL komandası ilə eyni qrupa düşdüklərini xatırlayıb: "Həmin vaxt da ilk oyun İstanbulda keçiriləcəkdi. Lakin rəqibimiz Türkiyəyə gəlmədi və biz texniki qələbə qazandıq. İkinci oyun üçün biz Cənubi Kiprə getmişdik. Amma ölkəyə daxil olmağımıza ciddi maneələr yaradılmışdı".
