2 sentyabr 2011 12:36
Sadıqovun baş məşqçi kimi debütü Cavadova qarşı olacaq
Millimizin sabiq baş məşqçisi Vaqif Sadıqovun qarşıdakı 4 oyunda “Anji”nin baş məşqçisi funksiyasını yerinə yetirəcəyini xəbər vermişdik. Azerisport.az xəbər verir ki, buna Rusiya Futbol İttifaqının Nizam-İntizam Komitəsinin (NİK) Mahaçqala təmsilçisinin baş məşqçisi Hacı Hacıyevi cəzalandırması səbəb olub.
Bir daha xatırladaq ki, o, "Dinamo" ilə oyunun (2:1) fasiləsində ədalət təmsilçilərinin qərarlarına etiraz əlaməti olaraq hakimlər briqadasının otağının qapısını təpiklə sındırmışdı. Bu üzdən də Hacıyev dörd oyunluq diskvalifikasiya olunub. Belə olan halda, Hacı Hacıyevin birinci köməkçisi, həmyerlimiz Vaqif Sadıqov komandanın baş məşqçisi vəzifələrini yerinə yetirməli olacaq.
Maraqlıdı ki, təcrübəli mütəxəssisin bu mənada ilk sınağı "Volqa"ya qarşı olacaq. Hansı ki, Nijni-Novqorod klubunda millimizin hücumçusu Vaqif Cavadov top qovur. Həmyerlilərimizin komandalarının görüşü Premyer Liqanın 23-cü turuna təsadüf edəcək. Bu görüş Mahaçqalada baş tutacaq və sentyabrın 11-də keçiriləcək.
Sonda onu da qeyd edək ki, Sadıqov “Anji”ni baş məşqçi əvəzi kimi "Kuban", "Terek" və "Lokomotiv"lə oyunlarda da meydana çıxarmalıdı.
