3 sentyabr 2011 14:18
Galatasaray daha bir ulduzu rəsmən heyətinə qatdı
Türkiyənin "Galatasaray" klubu daha bir ulduz futbolçunu heyətinə qatıb. Azerisport.az xəbər verir ki, bu barədə İstanbul klubunun rəsmi saytı açıqlama yayıb.
Saytın açıqlamasında bildirilir ki, Yunanıstanın "Olimpiakos" klubunda çıxış edən ispan futbolçu Albert Riera ilə 4 illik rəsmi müqavilə imzalanıb.
Qeyd edək ki, 29 yaşlı ispan forvard "Mallorca" klubunun yetirməsidi. 2001-ci ildə komandanın əsas heyətinə cəlb olunan futbolçu (2001-2003, 46 oyun, 6 qol) 2003-cü ildə Fransanın "Bordeox" klubuna (2003-2005, 53 oyun, 4 qol) keçib. 2005-2008-ci illəri "Espanyol"da keçirən (72 oyun, 8 qol) Riera 2006-cı ildə "Manchester City"yə (15 oyun, 1 qol) icarəyə verilib. 2008-2010-cu illəri "Liverpool"da keçirən (40 oyun, 3 qol) hücumçu ötən mövsüm "Olimpiakos"un uğurları üçün çalışıb (28 oyun, 6 qol).
İspaniyanın U-18 və U-21 yığmaları ilə yanaşı, əsas millisində də çıxış edib (16 oyun, 4 qol) və 2009-cu ildə Konfederasiyalar Kubokunun qalibi olub. O, həmçinin iki dəfə İspaniya "Kral Kuboku"nu, bir dəfə Yunanıstan çempionluğunu qazanıb və 2007-ci ildə UEFA Kubokunun finalında oynayıb.
