5 sentyabr 2011 00:01
Leandro Roşa Qarabağda
“Qarabağ” daha bir legioner futbolçuyla güclənir. Azerisport.az xəbər verir ki, Ağdam klubu braziliyalı yarımmüdafiəçi Leandro Roşanı heyətinə qatır.
Qeyd edək ki, son mövsümü “Bakı”nın heyətində keçirmiş bu futbolçu həm yarımmüdafiə, həm də hücum xəttlərində çıxış edə bilir. Roşa Azərbaycanda ilk olaraq "Standard"ın şərəfini qoruyub. Daha sonra "İnter"ə keçən braziliyalı ötən mövsüm transfer pəncərəsi bağlanandan sonra - oktyabr ayında "Bakı"nın heyətində peyda olmaqla böyük qalmaqala səbəb olmuşdu. Mövsüm başa çatandan sonra isə baş məşqçi Alekaandr Starkov intizamsızlığı ilə seçilən futbolçunu heyətdən kənarlaşdırmışdı.
Deyəsən, Roşa bu ildə məhz transfer pəncərəsi bağlanandan sonra “Qarabağ”a gəlir. Düzdü, onun Ağdam klubunun şərəfini qoruyacağına dair şayiələr hələ yayda da var idi. Amma onun daha çox “İnter”ə dönəcəyi gözlənilsə də, bu, baş vermədi. Sabah isə braziliyalının rəsmən “Qarabağ”lı olacağı bildirilir. Transer pəncərəsi bağlı olduğu halda bu oyunçunun çempionata buraxılıb-buraxılmayacağı isə maraq doğurur.
