6 sentyabr 2011 12:33
AFFA azarkeşlərə müraciət ünvanladı
AFFA rəhbərliyi azarkeşlərə müraciət ünvanlayıb. Azerisport.az xəbər verir ki, müraciətdə bu gün keçiriləcək Azərbaycan – Qazaxıstan oyununda müəyyən qaydalar riayət olunması xahiş edilib.
Həmin müraciəti olduğu kimi diqqətinizə çatdırırıq: “Azərbaycan milli komandasının keçirdiyi oyunlar zamanı millimizi yüksək səviyyədə dəstəklədiyinə görə AFFA-nın rəhbərliyi azarkeşlərə dərin minnətdarlığını bildirir və inanır ki, Avro-2012-nin seçmə mərhələsi çərçivəsində bu gün keçiriləcək Azərbaycan – Qazaxıstan oyununda da azarkeşlər komandamızı 90 dəqiqə ərzində qələbəyə səsləyəcək. FİFA və UEFA bayrağı altında keçirilən yarışların Əsasnaməsinə, həmçinin qəbul olunmuş beynəlxalq protokol qaydalarına uyğun olaraq, stadionda rəqib, eləcə də meydan sahibi komandanın himnləri səsləndirilərkən, AFFA rəhbərliyi azarkeşlərdən himnlərə hörmətlə yanaşmalarını və təhlükəsizlik qaydalarına riayət etmələrini xahiş edir”.
