6 sentyabr 2011 12:47
FİFA və AFFA Jabanı bağışladı
17 may 2011-ci il tarixində FİFA tərəfindən AFFA-ya ünvanlanan No 100094 saylı məktubda “Bakı” FK-nın futbolçusu Silvino Joao De Carvalyonun (Jaba) Braziliyanın “İtuano Sociedades de Futebol” klubuna olan borcunun faiz hissəsinin 25 may 2011-ci il tarixinə kimi ödənilməsi göstərilmişdi. Azerisport.az xəbər verir ki, futbolçu göstərilmiş tarixə kimi nəzərdə tutlan məbləği ödəmədiyi üçün FİFA futbolçunun oyunlarda iştirakına qadağa qoymuşdu.
Həmin qərara uyğun olaraq, AFFA-nın İntizam Komitəsi də futbolçunun AFFA bayrağı altında keçirilən yarışlarda iştirakına qadağa qoymuşdu. Lakin 27 iyul 2011-ci il tarixində FİFA-nın AFFA-ya ünvanladığı məktubunda Jabanın əvvəlki klubuna olan borcunu tam şəkildə ödədiyi üçün futbolçuya qoyulmuş sanksiyaların FİFA tərəfindən ləğv edildiyi göstərilib.
Məhz yuxarıda göstərilənləri nəzərə alaraq AFFA da bu futbolçu haqqında qərarını dəyişib. Belə ki, İntizam Komitəsinin iclasında aşağıda göstərilmiş qərarlar qəbul edilib:
1. 20 may 2011-ci il tarixində AFFA-nın İntizam Komitəsinin futbolçu Silvino Joao De Carvalyo haqqında çıxardığı qərar ləğv edilsin.
2. Futbolçu Silvino Joao De Carvalyo AFFA bayrağı altında keçirilən yarışlarda iştirak edə bilər.
