8 sentyabr 2011 16:58
“Azərbaycan bizi cinahlardan yıxdı”
Qazaxıstan yığmasının hücumçusu Sergey Ostapenko AÇ-2012-nin seçmə mərhələsi çərçivəsində Bakıda keçirilən Azərbaycanla oyundan (2:3) sonra azerisport.az saytına müsahibə verib.
“Çox yaxşı oyun alındı. Xüsusilə Azərbaycanın oyununu qeyd edərdim. Məğlub durumda olsalar da, qarşılaşmada dönüş yarada bildilər. Onlar özlərində güc tapıb daha böyük qüvvə ilə hücuma keçdiər ki, bunun da faydasını gördülər. Biz isə görünür rəqibin ikinci hissəyə bu cür başlayacağını gözləmirdik” – deyə, Ostapenko matçla bağlı fikirlərini dilə gətirib.
Onun sözlərinə görə, bu qarşılaşmadan ən azı heç-heçə ilə ayrıla bilərmişlər: “Əlbəttə, bizim hesabı minimuma endirəndən sonra daha bir qol vurmaq şansımız var idi. Biz hesabı bərabərləşdirmək üçün çalışdıq da. Sadəcə, öz imkanlarımızdan yararlana bilmədik. Fikrimcə, bu mənada bir qədər bəxt amili də özünü göstərdi”.
Ostapenki qarşılaşmadan sonra da bildirir ki, Bakıya qələbə üçün gəlibmişlər: “Biz Bakıya qələbə üçün gəlmişdik. Sadəcə, bu gün bizdə alınmadı. Çox təəssüf ki, hər şey belə alındı. Amma bu, hər kəsdə ola bilər”.
Rəqib futbolçu millimizin çıxışına da xüsusi toxunub: “Azərbaycan millisində bu gün cinahlar çox yaxşı oynadı. Bizim müdafiəmizi məhz cinahlardan yarmaqla 3 qol vurdular. Amma hesab edirəm ki, Azərbaycanın Astanadakı oyunuyla müqayisədə bu dəfə ciddi bir fərq yox idi. Həm də burda bir qədər hava şəraiti də istənilən oyunu sərgiləməyə mane olurdu”.
