9 sentyabr 2011 14:00
“Neftçi Barselonadı ki, bizi udmağı çempionluqdan üstün tuturlar”?
“Neftçi” fan klubunun rəhbəri Ceyhun Bədəlzadə “Xəzər Lənkəran”la oyun haqqında fikirlərini bildirib. Azerisport.az xəbər verir ki, o, PFL-in rəsmi saytına açıqlamasında bunları dilə gətirib:
“Bizim üçün fərqi yoxdur “Neftçi” hansı komanda ilə qarşılaşır. “Xəzər Lənkəran”la oyun da bizim üçün adi bir qarşılaşmadı. “Neftçi” azarkeşləri bu oyunda da komandamızı dəstəkləyəcək. “Flaqman” fan klubundan təxminən 15 nəfər, digər azərkeşlərimiz isə pərakəndə şəkildə bu oyunu izləmək üçün Lənkərana yollanacaq. “Xəzər Lənkəran”-“Neftçi” oyununu bu qədər şişirtmək lazım deyil. “Xəzər Lənkəran”ın bəzi azarkeşlərinin “razıyıq, çempion olmayaq, ancaq “Neftçi”ni udaq” fikirləri ilə də razı deyiləm. Mən başa düşə bilmirəm “Neftçi” “Barselona”dı ki, bizi udmağı çempionluqdan üstün tuturlar? Qoy “Neftçi” “Xəzər Lənkəran”a uduzsun, ancaq sonda çempion olaq. Məncə çempionluq hər şeydən önəmlidi”.
