10 sentyabr 2011 14:03
Neftçinin məşqçisini Lənkəranda döydülər
Premyer Liqada çıxış edən komandaların əvəzedici heyətləri arasında keçirilən Azərbaycan çempionatının 5-ci turu çərçivəsində ötən gün “Xəzər Lənkəran” və “Neftçi” komandalarının əvəzedici heyətləri üz-üzə gəliblər. Azerisport.az xəbər verir ki, qarşılaşma Lənkəran Olimpiya Mərkəzinin əsas meydançasında keçirilib.
Maraqlı və gərgin keçən oyun 2:3 hesabı ilə bakılıarın xeyrinə bitib. Oyunun gedişində isə tribunada qarşıdurma yaşanıb. Belə ki, şahidlərinin dediyinə görə azarkeşlərdən biri “Neftçi”nin məşqçisi Bəxtiyar Musayevlə söhbət zamanı “Sən də Lənkəran çörəyi yemisən axı, hərdən bir haqqı danış da nə olar ” deməsinə Musayev “mən həmişə “Neftçi”nin çörəyini yemişəm” cavabı aranı qarışdırıb. Mübahisə elə yenicə sakitləşirmiş ki, “Neftçi” klubunun əməkdaşlarından biri yerli azarkeşləri təhqir edib. Bundan sonra necə deyərlər “vur çatlasın” başlayıb. Tribunadakı azarkeşlərin əksəriyyəti “Neftçi” rəsmiləri istiqamətində axışıb. Bu zaman Bəxtiyar Musayev lənkəranlı azarkeşlərdən birinin yumruq zərbəsinə tuş gəlib. Münaqişə yalnız asayiş keşikçilərinin müdaxiləsindən sonra yatırılıb. (12-ci oyunçu)
