10 sentyabr 2011 00:12
Fenerbahçe üçün daha bir bəd xəbər
Türkiyə futbolundakı danışılmış oyunlarla əlaqədar prezidenti Aziz Yıldırım başda olmaqla bir neçə rəsmisi həbs olunan, UEFA Çempionlar Liqasından uzaqlaşdırılan “Fenerbahçe” daha bir xoş olmayan xəbərlə sarsılıb. Azerisport.az xəbər verir ki, İstanbul klubu Beynəlxalq İdman Arbitraj Məhkəməsindən (CAS) rədd cavabı alıb.
Qeyd edək ki, “Fenerbahçe” başbilənləri üzləşdikləri belə xoşagəlməz olaylar səbəbindən çoxlu maddi ziyanla üzləşdikləri üçün CAS-a müraciət etmək məcburiyyətində qalmışdı. Belə ki, “sarı-lacıvərdlilər” UEFA ilə Türkiyə Futbol Federasiyasından məhkəmə yolu ilə 45 milyon avro təzminat almaq istəyirdi.
Beynəlxalq İdman Arbitraj Məhkəməsi hətta onların bu müraciətini qəbul edərək, rəsmi dava açmış, qitə və Türkiyə futbol federasiyalarından bu məsələ ilə bağlı rəsmi izahat tələb etmişdi. Məhz həmin izahatları aldıqdan sonra CAS “Fenerbahçe”nin açdığı məhkəmə iddiasını əsassız sayaraq, bu işin dayandırıldığını bəyan edib.
