11 sentyabr 2011 23:25
Sadıqov Cavadovsuz Volqa üzərində qələbəyə sevindi (YENİLƏNİB)
Rusiya Premyer Liqasında 23-cü turun oyunları keçirilib. Azerisport.az xəbər verir ki, bu gün hesabat turu çərçivəsində azərbaycanlı futbolsevərlər üçün böyük maraq kəsb edən bir görüş baş tutub.
Belə ki, millimizin sabiq baş məşqçisi Vaqif Sadıqovun çalışdığı "Anji" doğma meydanda Azərbaycan yığmasının hücumçusu Vaqif Cavadovun çıxış etdiyi "Volqa"nı qəbul edib. Qarşılaşma Mahaçqalada keçirilib.
Qeyd edək ki, "Anji"nin işləri bu mövsüm heç də pis getmirdi. Belə ki, Mahaçqala klubu bu oyundan öncə 37 xalla 6-cı pillədəydi və liderlərdən 9 xal geri qalırdı. Nijni Novqorod klubunun işləri isə heç də yaxşı getmirdi. Elitada qalmaq uğrunda mübarizə aparan Cavadovun komandası 20 xalla 16 komanda arasında 12-ciydi.
Yeri gəlmişkən vurğulayaq ki, Mahaçqala klubunun baş məşqçisi Hacı Hacıyev cəzalı olduğundan komandanı bu oyunda meydana Vaqif Sadıqov çıxarmışdı. Bir qayda olaraq hər dəfə sonradan meydana çıxan Cavadovun da Sadıqovun komandasına qarşı oynaması istisna olunmurdu. Lakin təəssüf ki, o, bu oyunda ilk "18-liy"ə salınmamışdı.
Oyuna gəlincə, Cavadovun komanda yoldaşları erkən qol vursalar da, qalan dəqiqələr ərzində Eto`O, Roberto Karlos kimi dünya şöhrətli ulduzlara malik Sadıqovun komandası əzmkar qələbə qazanmağı bacardı.
Sonda onu da qeyd edək ki, millimizdən dəvət alan həmyerlimiz Emin Mahmudovun çıxış etdiyi Moskva "Spartak"ı da bu gün "Amkar"ın qonağı olub və 1:0 hesabıya qələbə qazanıb. Emin ehtiyatda qalıb.
Rusiya Premyer Liqası
23-cü tur
11 sentyabr
Anji - Volqa - 2:1 (1:1)
Qollar: Eto`O, 17, Şulenin, 61-öz qapısına - Pleşan, 4.
