11 sentyabr 2011 20:37
Qurban Qurbanov: Bəzi futbolçulardan narazı qaldım
“Qarabağ”ın baş məşqçisi Qurban Qurbanov Premyer Liqanın 5-ci turunun “Sumqayıt Şəhər”lə oyununu şərh edib. Azerisport.az xəbər verir ki, o, komandasının xal itirdiyi (0:0) görüşdən sonra bunları dilə gətirib:
“Sumqayıtın güclü futbol ənənələri var. Azarkeşləri komandalarına güclü dəstək göstərirlər. Biz bu oyunda bunun bir daha şahidi olduq. Çoxsaylı qol imkanlarımız olsa da, bunlardan istifadə edə bilmədik. Qol vurmadıqca futbolçularımda psixoloji gərginlik artırdı. Bəzi futbolçulardan narazı qaldım. Millinin oyunlarından sonra belə oyuna hazırlaşmaq çətin olur. Qalib gəlmək istəyirdik. Rəqibizə yuxarıdan aşağı baxmırdıq, meydana arxayın çıxmamışdıq. 90 dəqiqə qapalı futbol oynayan komandaya qarşı mübarizə aparmaq çətindir. Gələcək oyunlarda “Sumqayıt Şəhər”ə uğurlar arzulayıram. Bu oyun artıq arxada qaldı. “Xəzər Lənkəran”la oyuna hazırlaşacağıq”.
