“Bu, Azərbaycan futbolundakı ən böyük problemlərdən biridi”

“Qarabağ”ı yarımmüdafiəçisi Rəşad Sadiqov azerisport.az saytına müsahibəsində komandasının “Sumqayıt Şəhər”lə oyununa hazırlığından, Qurban Qurbanovun yoxluğundan və milli komandadan danışıb.

 

- “Sumqayıt Şəhər”lə oyundan nə gözləyirsiz?
- Bu, çox gənc komandadı. Hələ potensialını tam aça bilməyib. Təcrübə çatışmazlıqları var. Hesab edirəm ki, “Sumqayıt Şəhər” “Qarabağ”a qarşı layiqli müqavimət göstərəcək. Mən Sumqayıtdakı qazonun hansı vəziyyətdə olduğunu bilmirəm. Amma bu, onsuz da Azərbaycan futbolundakı ən böyük problemlərdən biridi. Qəbələdən başqa normal qazona heç yerdə rast gəlmək olmur.

 

- “Qarabağ” bu görüşün favoritidi?
- Əgər komanda Avropaya çıxmağı hədəfləyirsə, bu rəqibini məğlub etməyə borcludu. Biz rəqibə hörmətlə yanaşırıq və düşünürük ki, güclü olan qələbə qazanacaq. Gənc futbolçulara da “Qarabağ”a qarşı oynamaq maraqlı olacaq. Biz mümkün qədər hər şeyi erkən həll etməyə çalışmalıyıq. Elə ilk yarıda vurulacaq qol bizə çox kömək edər.

- Qurbanovun yoxluğu “Qarabağ”ın oyununa təsir göstərməyəcək ki?
- Bildiyimə görə, o, oyuna qədər qayıdacaq. Həm də o, hər gün köməkçiləri ilə tez-tez əlaqə saxlayırdı. Məşqlərimiz həmişəki qaydada davam edib. Baş məşqçi də öz tapşırıqlarını telefonla verib.

 

- Yığmanın son iki oyunun hər ikisində ehtiyatda qaldınız...

- Mən 4 xal qazanmağımızdan razı qaldım. Bu, bizim hamımızı sevindirməlidi. Amma bir şeyi də başa düşmək lazımdı ki, Belçika ilə oyunda bizim sadəcə bəxtimiz gətirdi. Onlar nə qədər qol epizodunu boşa verdilər. Amma Qazaxıstanla oyunda biz daha üstün idik. Xüsusilə də, ikinci hissədə. Odu ki, komandada potensial var.

 

- Biz seçmə mərhələdə 7 xal qazanmağımıza sevinə bilərik?
- Azərbaycan yığması indiyə qədər heç vaxt 5 xaldan artığını toplaya bilməmişdi. Amma bizim hələ daha iki oyunumuz var ki, hazırkı nəticəni daha da yaxşılaşdıra bilək. Avstriya ilə oyunda minimum heç-heçəyə oynamaq olar. Amma güman ki, onlar belçikalıların aqibətini yaşamaq istəməyəcəklər.

 

- Bir müddət öncə ailənizdə faciə baş verdi – qardaşınızı itirdiniz. Bu faciədən sonra özünüzə gələ bilmisiz?
- 90 faiz. 10 faiz hələ də ağır təəssürat və qüssə içindəyəm. Hərdən bu haqda düşünürəm. Psixoloji cəhətdən mən əvvəlki Rəşad deyiləm. Mənə hər şeyi unutmaq üçün zaman lazımdı.