11 sentyabr 2011 11:48
Sergey Yuran İnterlə oyundan sonra qalmaqalla üzləşib
“Simurq”un baş məşqçisi Sergey Yuran Premyer Liqanın 5-ci turunun “İnter”lə oyunundan sonra qalmaqal iştirakçısına çevrilib. Azerisport.az xəbər verir ki, rusiyalı mütəxəssisin ilk qalmaqalı sözügedən oyunun AFFA nümayəndəsi Əsgər Əmirəliyevlə düşüb.
Belə ki, nümayəndə ona oyundan sonra keçirilən mətbuat konfransında “İnter”in baş məşqçisi Kaxaber Tsxadadze ilə birgə iştirak etməməsini irad tutub. Yuran isə cavab verib ki, hətta Rusiyada da adətən məşqçilər mətbuat konfransına ayrı-ayrılıqda gəlib, jurnalistlərin suallarını cavablandırırlar.
Bu üzdən tərəflər arasında kiçik mübahisə yaranıb ki, söhbətə hətta Peşəkar Futbol Liqasının təhlükəsizlik xidmətinin işçilərindən də qarışan olub. Yuran isə onlara öz hərəkətlərinə diqqət yetirməyi, onunla əllə danışmamalını məsləhət görüb. Lakin sonda gərginlik ciddi insident baş vermədən sakitləşib.
