12 sentyabr 2011 16:25
Azərbacanlı hakim: Onsuz da axırıncı oyunumdu
Birinci dəstədə yarışan “Qaradağ-Lökbatan” klubu Neftçala rayonunda eyniadlı komandayla keçirilən və 1:1 hesabıyla başa çatan matçla bağlı açıqlama yayıb. Azerisport.az xəbər verir ki, klubun icraçı direktoru Tahir Mustafayev bildirib ki, oyunun hakimi Ramiz Əhmədovun idarəçiliyindən heç də razı qalmayıblar:
“Təşkilatçılıq çox zəif idi. Oyun 7 dəqiqə gec başladı. Bundan əlavə, hakim bir neçə ədalətsiz qərarlarıyla yadda qaldı. Qarşılaşma tam üstünlüyümüz şəraitində keçdiyi halda, sanki Ramiz Əhmədov hər vəchlə qələbə qazanmağımıza mane olmağa çalışırdı. Belə ki, rəqib komandanın cərimə meydançasında top oyunçunun əlinə dəysə də, onbirmetrlik cərimə zərbəsi verilmədiyi halda, bizim komandanın qapıçısı Elçin Cəfərov təmiz topa oynayarkən, bu zərbə bizim qapımıza təyin olundu. Oyun ərzində 12 dəfə sarı vərəqə verildi. Bundan başqa, hakimin yerli-yersiz fitləri oyunun tempini aşağı salırdı. Etiraz etdikdə isə o bizə çox qəribə bir cavab verdi ki, «onsuz da axırıncı oyunumdu». Başa düşmürəm, bu nə məntiqsizlikdir. Onu da qeyd edim ki, çoxlu sayda cərimələr olduğu halda, Ramiz Əhmədov oyunun sonuna cəmi 4 dəqiqə vaxt əlavə etdi. Məgər, belə bir məsuliyyətli oyunu üç ayda bir dəfə təyinat alan hakimə etibar etmək olar?!”
O bildirib ki, “Neftçala” komandasının topdaşıyanları hər dəfə açıq-aşkar oyunu gecikdiribər: “Bax, bu kimi səbəblər ucbatından komandamız qələbəyə layiq olduğu halda, bir xalla kifayətlənmək məcburiyyətində qaldı”.
