13 sentyabr 2011 15:07
“Azərbaycan dili bizə yaxın olduğu üçün anlamaqda çətinlik çəkmirik”
Türkiyənin “Beşiktaş” klubunun sabiq müdafiəçisi İbrahim Üzülməzin Bakıda təşkil olunan B kateqoriyalı məşqçi kursuna qatıldığını xəbər vermişdik. Azerisport.az xəbər verir ki, o, sentyabrın 22-dək davam edəcək seminarlarda iştirak edəcək.
Lakin Türkiyə mətbuatının yaydığı məlumata görə, Üzülməz bu kurslarda iştirak edən yeganə türk deyil. Belə ki, ötən il “Aydınspor 1923”də çalışan məşqçi Hayrettin Tabak da Bakıya gəlib. Bu haqda o, özü məlumat verib. Tabak açıqlamasında “İnter” və “Xəzər Lənkəran”ın aşağı yaş qruplarından ibarət komandalarında çalışan sabiq komanda yoldaşları - Murat Yoldaş və Ercan Kılıç ilə görüşməyə imkan tapdıqlarını dilə gətirib:
“UEFA-dan B lisenziyasını aldıqdan sonra komandaya rəhbərlik edə biləcəm. Bakıda sabiq komanda yoldaşlarımdan Murat Yoldaşın qonağıyam. Dərslərimizi almanca alırıq. Azərbaycanlı tərcüməçi də bizə bu işdə yardımçı olur. Azərbaycan dili bizə yaxın olduğu üçün anlamaqda çətinlik çəkmirik”.
