13 sentyabr 2011 16:12
Yerli futbolçularla əcnəbilər arasında kəskin fərq
Futbol üzrə Azərbaycan Premyer Liqasının geridə qalan beş turunda 28 qarşılaşma keçirilib. Azerisport.az xəbər verir ki, bu oyunlarda 67 qol qeydə alınıb.
Qeyd etmək lazımdır ki, 3-cü turda keçirilən “İnter” - “Bakı” qarşılaşmasında ev sahibi komanda meydanı oyun başa çatmamış tərk etdiyinə görə 0:3 hesablı texniki məğlubiyyət almışdı. Bundan əlavə Premyer Liqada 2 avtoqol da qeydə alınıb. “Simurq”un kapitanı Rasim Ramaldanov və “Neftçi”nin müdafiəçisi Ruslan Abışov hərəyə bir dəfə avtoqol müəllifi olublar.
Beləliklə, geridə qalan turlar ərzində qapılara vurulmuş 64 qoldan 43-ü legionerlərin, 21-i isə yerli futbolçuların aktivinə yazılıb. Legioner futbolçuların siyahısında bombardir Sergey Artyuxdu. “Turan”ın ukraynalı yarımmüdafiəçisi 5 oyunda 4 dəfə rəqib qapılarına yol tapmaqla həm də Premyer Liqada da ən sərrast futbolçuların siyahısına başçılıq edir.
Premyer Liqanın ən çox qol vuran yerli futbolçusu isə Ceyhun Sultanovdu. “Kəpəz”in yarımmüdafiəçisi cari çempionatda 3 dəfə fərqlənib.
1-ci və 2-ci turlarda 12, 3-cü turda 15, 4-cü turda 11, 5-ci turda isə 14 qol qeydə alınıb.
