16 sentyabr 2011 14:33
Mişel Platini: Futbol üçün ölüm təhlükəsi var
UEFA prezidenti Mişel Platini maraqlı açıqlamalarla çıxış edib. Azerisport.az xəbər verir ki, o, futbolda yolsuzluqla mübarizə aparmağın vacibliyini irəli sürərək, bu idman növü üçün ölüm təhlükəsi olduğunu söyləyib.
Qitə futbol qurumunun rəhbəri futbolda rüşvət qalmaqallarını artmasının bu idman növünə böyük zərbə endirdiyini xüsusi vurğulayıb. “Futbol bir çox idman növləri kimi ölüm təhlükəsi içindədi. Bu idman növsünün gözəlliyi onun nəticələrinin doğruluğundadı. Bu, ən adi bir matçdan dünya çempionatının oyununa kimi aiddi. Ancaq belə davam edərsə, bu oyun üçün həyəcanlanmağın mənası qalmayacaq”.
Artıq mətbuatda hər gün danışılmış oyunlarla bağlı xəbərlərin yer almasından narahatlığını dilə gətirən Platini bu ölüm təhlükəsinə qarşı sona kimi mübarizə aparacaqlarını, bundan ötrü əllərindən gələni əsirgəməyəcəklərini bildirib.
Qeyd edək ki, qitə futbol qurumu artıq bu günlərdə danışılmış oyunlarla mübarizə aparmaq üçün yeni komitə yaradıb. Bura bütün UEFA üzvü olan ölkələrdən, eləcə də AFFA-dan xüsusi nümayəndələr ayrılıb ki, sırf danışılmış oyunların üzə çıxarılmasında yardımçı olsunlar.
