18 sentyabr 2011 01:54
Mourinyo: Realın əsas hədəfi La Liqada qalmaqdı
İspaniyanın "Real" (Madrid) klubunun baş məşqçisi Joze Mourinyo yenidən qəribə açıqlaması ilə diqqət mərkəzinə düşüb. Azerisport.az xəbər verir ki, portuqaliyalı mütəxəssis La Liqanın 4-cü turunda qarşılaşacaqları "Levante" ilə oyunöncəsi keçirdiyi mətbuat konfransında "Barcelona"nın baş məşqçisi Pep Qvardiolanı rəsmən ələ salıb.
Əsasən "Levante" ilə oyun haqda danışan Mourinyo hazırda turnir cədvəlinə başçılıq etmələrinə baxmayaraq, bu mövsüm hədəflərinin La Liqada qalmaq olduğunu açıqlayıb:
"Bu mövsüm əsas hədəfimiz La Liqada qalmaqdı. Ümumilikdə 40 xal toplamaqla təhlükəli zonadan uzaqlaşmağa çalışacağıq. Bundan sonra isə digər məqsədlər üçün oynayacağıq".
Qeyd edək ki, Qvardiola bir neçə gün öncə verdiyi açıqlamada bu mövsümü titulsuz başa vurmalarının imkansız olduğunu söyləmişdi.
