20 sentyabr 2011 13:23
Baş məşqçi bir, futbolçular dörd oyunluq diskvalifikasiya olundu
Bu gün keçirilən AFFA İntizam Komitəsinin iclasında Premyer Liqada çıxış edən klubların əvəzedici heyətlərinin 6-cı turunun oyunlarında baş verən qanun pozuntularına da hüquqi qiymət verilib. Azerisport.az xəbər verir ki, aparılan müzakirələrdən sonra aşağıdakı qərarlar çıxarılıb.
AZAL – “İnter” matçında “İnter”in 5 futbolçusu sarı vərəqə ilə cəzalandığı üçün klub 500 manat cərimə olunub. Oyunun 85-ci dəqiqəsində “İnter”in futbolçusu Əbülfəz Hüseynli kobud oyuna görə birbaşa qırmızı vərəqə alaraq meydandan kənarlaşdırıldığı üçün 2 oyunluq cəzalanıb, klubu 1000 manat cərimə olunub. Matçın 85-ci dəqiqəsində AZAL-ın futbolçusu Elmir Məmmədov aqressiv oyuna görə birbaşa qırmızı vərəqə alaraq meydandan kənarlaşdırıldığı üçün 3 oyunluq cəzalanıb, klubu 1500 manat cərimə olunub.
“Rəvan” – “Sumqayıt Şəhər” matçında “Sumqayıt Şəhər”in 4 futbolçusu sarı vərəqə ilə cəzalandığı üçün klub 500 manat cərimə olunub. Oyunun 44-cü dəqiqəsində “Sumqayıt Şəhər”in futbolçusu Eldar Məmmədovla “Rəvan”ın futbolçusu Ramil Nuriyev aqressiv oyuna görə (rəqibə başla zərbə) birbaşa qırmızı vərəqə alaraq meydandan kənarlaşdırıldığı üçün hər iki futbolçu 4 oyunluq cəzalanıb, klubları 2000 manat cərimə olunub. Matçın 70-ci dəqiqəsində “Sumqayıt Şəhər”in baş məşqçisi Vaqif Paşayev texniki zonadan kənarlaşdırıldığına görə 1 oyunluq cəzalanıb, klubu 500 manat cərimə olunub.
Matçın protokolunda oyunun 87-ci dəqiqəsində “Sumqayıt Şəhər”in futbolçusu Samir Yusifovla “Rəvan”ın futbolçusu Muxtar İsmayılov aqressiv oyuna görə (rəqibə başla zərbə) birbaşa qırmızı vərəqə alaraq meydandan kənarlaşdırılması göstərilib. Lakin matçın video yazısını izlədikdə hər iki futbolçuya göstərilən qırmızı vərəqənin əsassız olduğu aşkar olunub. Bu səbəbdən də hər iki futbolçuya göstərilən vərəqə ləğv edilib.
