21 sentyabr 2011 18:10
Turan dağıla, Premyer Liqa 11 klubla oynanıla bilər
Futbol üzrə Azərbaycan Premyer Liqası cari mövsümü 11 klubla davam etdirə bilər. Azerisport.az xəbər verir ki, hazırda ciddi maliyyə problemləri ilə üz-üzə olan “Turan”ın çempionatı tərk etməsi təhlükəsi yaranıb.
Səbəb isə artıq məlumdu: klub rəhbərliyi futbolçulara verməyə pul tapa bilmir. Qeyd edək ki, Tovuz klubunda maliyyə problemlərinin mövcudluğu hələ mövsümün əvvəlindən məlum idi. Lakin son anda klub prezidenti Musa Süleymanov problemi yoluna qoyduğunu bildirərək, çempionata start qərarı vermişdi. Nəticədə baş məşqçi postuna Əsgər Abdullayev gətirildi, yaxşı komanda quruldu. Hansı ki, məhz bu komanda “Kəpəz” və “Simurq”la oyunlarda qələbə qazandı.
Lakin 5-ci turun “Qəbələ” ilə oyunu ərəfəsində bu klubda maliyyə problemlərinin olduğuna dair söhbətlər yayılmağa başladı. Həmin dövrdən bəri klub rəhbərliyini oyuna çıxmamaqla hədələyən futbolçular “Qəbələ” və “Bakı” ilə görüşləri yola versələr də, hər ikisində məğlub oldular. Amma deyəsən, bu gedişlə növbəti turun “Rəvan”la görüşü həqiqətən baş tutmayacaq. Hər halda atalar üçdən deyiblər məsəli burda yerinə düşür.
Çünki futbolçular dünəndən etibarən məşqə çıxmaqdan da imtina edirlər. Onlar pullarını alana kimi bu etirazlarının davam edəcəyini bildirirlər. Süleymanov isə klubun maliyyə problemini yoluna qoya bilmir ki, bilmir. Məşq etməyən futbolçuların “Rəvan”la oyuna çıxmasının isə inandırıcı olmadığı aydın məsələdi. Hətta pullarını alsalar da, güman ki, 7-ci turun həmin görüşü baş tutmayacaq.
Daha qorxulusu isə, “Turan”ın ümumiyyətlə dağılması variantıdı. Çünki problemin həlli yolu da görünmür. Belə olan halda klubu ilk növbədə legionerlər tərk edəcəklər. Hansı ki, Ukrayna, Gürcüstan, Braziliya, Bolqarıstan, Almaniya və Monteneqrodan 9 əcnəbi futbolçu hazırda rəhbərlikdən müsbət qərar gözləyir.
Hazırda “Turan”ın Premyer Liqada qalıb-qalmayacağı bəlli deyil. Əgər komanda qarşıdakı iki oyuna çıxmasa, texniki məğlubiyyət alacaq və nəticədə avtomatik olaraq çempionatdan kənarlaşdırılacaq. Belə olan halda daha çox “İnter”, “Xəzər Lənkəran”, “Qəbələ” və “Bakı” itirəcək Hansı ki, tovuzlularla oyunlarda qazandıqları 3 xaldan məhrum olacaqlar.
