23 sentyabr 2011 13:01
Rəşad Sadiqov: Bu, bizə yaraşan yer deyil
“Qarabağ” sabah AZAL-la qarşılaşacaq. Azerisport.az xəbər verir ki, Premyer Liqanın 7-ci turunda vacib görüşə çıxacaq komandanın kapitanı Rəşad Sadiqov oyun öncəsi klubun saytına matçla bağlı fikirlərini bildirib:
“Bütün oyunlarda olduğu kimi AZAL-la görüşə də qələbə üçün çıxacağıq. Turnir cədvəlində vəziyyətimiz yaxşı deyil. Hazırda 8-ci pillədə qərarlaşmışıq ki, bu da bizə yaraşan yer deyil. Amma “təyyarəçilər”lə oyuna adi oyun kimi hazırlaşırıq. Əlavə gərginlik bizə çətinlik yarada bilər. AZAL yaxşı müdafiə olunma qabiliyyətinə malikdi. Oyunları alınanda qarşısıalınmaz olurlar. Öz meydanları olduğu üçün onlar da qələbə üçün vuraşacaqlar. Belədə maraqlı oyun olacaq. Görüşün süni ot örtüklü meydançada olmasının həm yaxşı, həm də mənfi tərəfi var. Meydança ağır olsa da, düz olduğuna görə topla hərəkət etmək daha əlverişli olar. Ötən mövsüm AZAL-ın ikinciliyi əlimizdən almasını unutmuşuq. Daha dəqiqi, bu haqda fikirləşmək bizə fayda verməyəcək. Ona görə də sadəcə öz oyunumuza köklənməyə çalşırıq. Əsas hədəfimiz uğursuzluq zolağından çıxmaqdı. Bilirik ki, ardıcıl 2 qələbə bizi yenidən zirvə üçün vuruşmağa şərait yaradacaq. Bizim problemimiz hər halda ümumi yorğunluqla bağlıdı. Düzdü, bu, bir qədər təkrarçılıqdı. Amma həqiqətən də 3 il istirahət etmədən oynamaq öz sözünü deyir. Ona görə də bizdə enişin zaman-zaman müşayət olunması normaldı. Amma bu mövsüm hədəfimiz daha yuxarıda qərarlaşmaq olduğuna görə daha artıq fədakarlıq etməliyik. AZAL hər nə qədər çətin rəqib olsa da, öz sözümüzü deməliyik”.
