28 sentyabr 2011 12:45
“Bizdə olan baza bir çox klubda yoxdu”
Futbol üzrə Azərbaycan birinci divizionunda artıq üç tur geridə qalıb. Azerisport.az xəbər verir ki, komandalardan yalnız “Karvan” maksimum nəticə qazanaraq 9 xalla turnir cədvəlinə liderlik edir.
Bir vaxtlar ölkəmizi avrokuboklarda layiqincə təmsil etmiş Yevlax təmsilçisinin hazırkı durumu və qarşısına qoyduğu məqsədlər haqqında klubun baş məşqçisi Zakir Mahmudov məlumat verib: “Gənc, mübariz, sona qədər vuruşan komanda formalaşdıra bilmişik. Yevlax futbolunun yetirməsi olan Kənan Kərimov da yenidən “Karvan”ın heyətindədi. Kənan bu mövsüm Premyer Liqada oynamaq istəyirdi. Transfer pəncərəsi bağlandıqdan sonra Kənanla danışdım və o, “Karvan”ın heyətində qalmağa razılılq verdi. Onun göstərdiyi oyundan razıyam. Biz qarşımıza ancaq yer tutmağı və Premyer Liqaya vəsiqə qazanmağı məqsəd qoymuşuq. Bizim üçün burada çox yaxşı şərait yaradılıb, bizdə olan baza bir çox klubda yoxdu. “Şəmkir” və “Tərəqqi” ilə oyunlarımız çox çətin keçdi. Rəqibin kimliyindən asılı olmayaraq hər oyuna yalnız qələbə qazanmaq üçün çıxırıq. Növbəti turda “Göyəzən”lə qarşılaşacağıq. Çətin oyun olacaq, ancaq biz Qazaxdan qələbə ilə dönməyə çalışacağıq".
