30 sentyabr 2011 11:38
8-ci tur. Asim Xudiyevinin proqnozu
Futbolumuzun veteranı Asim Xudiyev premyer-liqanın səkkizinci turuna dair fikirləri ilə bölüşüb.
Qəbələ - Rəvan
"Qəbələ"nin ev sahibi olması yerli komandanın qələbə ehtimalını yüksəldir. "Qəbələ" evdə yaxşı oynayır. "Radar"lar son iki oyunu məğlub olub. Rəqibləri isə hətta "Turan"ı səfərdə məğlub edib. Komandlar döyüşkən oynayacaq. Düşünürəm ki, heç-heçə olacaq. Digər tərəfdən "Rəvan" texnikalı futbola üstünlük verir. Qəbələ stadionu onlara imkanlarını nümayiş etdirməyə şərait yaradacaq. Belə gözəl meydanda komandaların şansları bərabərləşir.
Kəpəz - Sumqayıt Şəhər
Son turlarda gəncəlilər özlərini yaxşı tərəfdən göstəriblər. Səfər oyunlarında Allahverdiyevin yetirmələrinin döyüş əhvalı çox yüksəkdir. "Bakı" (3:0) və "İnter"lə (0:0) oyunlar buna nümunədr. Sumqayıt Şəhər autsayder olsa da, ambisiyalıdır. Əsasən gənclərdən təşkil olunub. Gücləri çatsa Gəncədən bir xal apara biləcəklər. Belə isə "Kəpəz" qalib gəlməlidir.
Bakı - AZAL
Hər iki komanda ötən tur məğlub olub. Təbii ki hər ikisi bərpa olmaq istəyir. Oyun gərgin olacaq. Düşünmürəm ki baxımlı oyun olsun. Komandalar ilk növbədə kapılarının toxunulmazlığı haqda düşünəcəklər. Ehtiyatlı oyun izləyəcəyik. Bu oyunda heç-heçə təxmin edirəm.
Qarabağ - Turan
Ağdam klubu yaxşı futbol oynamaqda davam edir. “Xəzər Lənkəran”a məğlubiyyətə baxmayaraq, onlar toparlana və AZAL-ı məğlub edə bildilər. Bu qələbə onlar üçün çox şeyə dəyər. “Turan” hazırda heç də yaxşı günlərini yaşamır. İstənilən halda “Qarabağ”ın qələbə qazanacağını düşünürəm.
Simurq – Neftçi
Əgər son iki turu götürsək, əminliklə söyləmək olar ki, hər iki komanda hazırda yüksəlişdədi. Təcrübə və uyğunlaşmış heyət bakılıların tərəfindədi. Zaqatalalılar isə hələ yenicə bir araya gəliblər. Bu üzdən də onlara çətin olacaq. Maraqlı oyun olacaq. Nəticədə qonaqların təcrübəsi qazanacaq. Baxmayaraq ki, “ağ-qaralar”a süni örtükdə çox çətin olacaq. “Simurq” rəqibinə ciddi çətinliklər yarada bilər. Amma istənilən “Neftçi” qələbə qazanmalıdı.
İnter – Xəzər Lənkəran
Bakılılar qol vəziyyətlərini reallaşdırmaqla bağlı problemlər yaşamaqdadılar. Bu gün “İnter”də sabit qol vura biləcək futbolçular yoxdu. Lənkəranlılar isə liderdilər. Bu turda da öz liderliklərini möhkəmləndirə bilərlər. Baxmayaraq ki, bu, çox çətin olacaq. Hər halda bərabər oyun və heç-heçə gözləyirəm.
