3 oktyabr 2011 13:08
Kəpəzin prezidenti: Bu, artıq məni də özümdən çıxardı
“Kəpəz”in mətbuat xidməti klubun prezidenti Elmir Əliyevin müsahibəsini yayıb. Azerisport.az həmin müsahibəni təqdim edir.
- Elmir müəllim, ardıcıl üç turdur ki, “Kəpəz” qələbə qazana bilmir. Amma öncəki oyunlarda komanda çox-çox güclü klubları böyük hesablarla yenmişdi. Nə baş verir?
- Komandada ab-hava çox yüksəkdir. Uşaqlar böyük həvəslə oyunlara hazırlaşırlar. Hər oyuna qələbə qazanmaq üçün meydana çıxırıq. Klub üçün bütün lazımi şərait yaradılıb. Komanda meydanda çox yaxşı təsir bağışlayır. Amma....
Mən “Sumqayıt Şəhər”lə oyuna qədər bir dəfə də olsun hakimlər barədə fikir söyləməmişəm. Lakin oyunun baş hakimi Rauf Cabbarovun komandamızı açıq-aşkar sıxması, qonaq komandanın qapıçısına qırmızı əvəzinə sarı vərəqə göstərməsi artıq məni də özümdən çıxardı. Belə olmaz. Azərbaycanda futbolun inkişafı üçün cənab Prezident İlham Əliyev lazımınca diqqət və qayğı göstərir. Biz də öz növbəmizdə ölkə başçısının idmanın bu sahəsinin yüksəlməsi üçün verdiyi tapşırıqları yerinə yetirməyə, Azərbaycanın ikinci şəhəri olan Gəncədə futbolu inkişaf etdirməyə çalışırıq. Lakin bəzi hakimlərin bizim komandanı meydanda daim sıxması, bizə qarşı birtərəfli mövqe tutmaları bizi çox üzür. Hamılıqla “Kəpəz”in müvəffəqiyyəti üçün çalışırıq. Külli-miqdarda vəsait xərclənir. Hər cur şərait yaratmışıq. Komanda da çox baxımlı futbol sərgiləyir. Ancaq bəzi hakimlər verdikləri yersiz və yaxud da qərəzli qərarları ilə əlimizi işdən soyudurlar.
- “Sumqayıt Şəhər”lə oyunda Ceyhun Sultanovun qapıçı tərəfindən əllə saxlanılması stadionda böyük narazılıq yaratdı?
- Əlbəttə yaratdı. Gəncədə futbolu sevirlər və qiymətləndirirlər. Hətta azarkeşlər də hakimin düzgün qərar vermədiklərini gördülər. Belə hakimlik ictimaiyyətin futbola olan marağını öldürür. Rauf Cabbarov I turda "Rəvan"la oyunda da meydanda bu ssenari ilə oyunu idarə edirdi. Lakin onda uşaqlar bunu hiss edərək sona qədər mübarizə apardılar və qalib gəldik. O oyundan sonra biz hakimlərə öz iradımızı bildirmişdik. Lakin dünən isə açıq aşkar Rauf Cabbarov “Kəpəz” komandasını meydanda sıxdı və qeyri-səmimi qərarlar verdi. Nəinki təkcə baş hakim, elə yan hakimlər də yersiz ofsaytlar “yaradırdılar”. Bir faktı da deyim. Ötən mövsüm komandamız Salyanda “Muğan” klubunu 1:0 yendiyi oyunda Rauf Cabbarov oyunu düz 5 dəqiqə artırdı və artırılmış vaxtda da həqiqətə uyğun olmayan cərimə zərbəsi təyin etdi ki, bu da qolla nəticələndi. Bütün bu faktlar Rauf Cabbarovun “Kəpəz” komandasına qarşı qərəzli olduğunu sübut edir.
- Bəlkə baş hakimin çıxardığı qərar qərəzli deyil, sadəcə təcrübəsizlikdən irəli gəlir?
- Bu barədə mən biz söz deyə bilmərəm. Həmin epizodda biz oyunu VİP-dən izləyirdik. Sarı kartdan sonra bütün stadion ayağa qalxdı. 4-cü hakimlə yan xətt hakimi Rauf Cabbarovu yanlarına dəvət etdilər. Hiss olunurdu ki, onlar da baş hakimdən qərarını dəyişməsini istəyirlər. Lakin Cabbarov qərarında qətiyyətli olduğunu dedi. Əgər bu, təcrübəsizlikdən irəli gəlirsə, onda qərarı dəyişə bilərdi. Bir də ki, bu cür hakimliklə birinci dəfə deyil ki, qarşılaşırıq.
- Hakim qərarı ilə bağlı etirazınızı bildirmisiniz?
- Bəli. Yəqin ki, AFFA-nın Hakimlər Komitəsi, Peşəkar Futbol Liqası bir ölçü götürəcəklər. Amma mən bir daha qeyd etmək istəyirəm ki, əgər Azərbaycanda futbolun inkişaf etməsini istəyiriksə, vicdanlı hakimlik və düzgün qərarlar qəbul etməliyik. Bu vaxtadək klubun inkişafına külli-miqdarda pul xərclənib. Biz çalışırıq ki, Gəncənin adına layiq mübariz komandası olsun. Buna mane olmaq istəyənlər, oyunu birtərəfli, qərəzli qərarlarla idarə edən bəzi hakimlər isə Azərbaycan futbolunun çiçəklənməsinə mane olanlardır. Qoy ya onları Avropaya təcrübə keçməyə göndərsinlər, ya da ümumiyyətlə hakimlikdən uzaqlaşdırsınlar. Premyer Liqa təcrübə toplamaq üçün deyil. Burada peşəkar klublar mübarizə aparır. Deməli, hakimlər də burada peşəkar olmalıdırlar.
