4 oktyabr 2011 11:28
“Bu fasilədən sonra artıq daha yaxşı AZAL görəcəksiz”
AZAL-ın yarımmüdafiəçisi Zohair Benuahi azerisport.az saytının suallarını cavablandırıb. “Təyyarəçilər”in mərakeşli legioneri öncə komandasının qeyri-sabit çıxışını dəyərləndirib:
“Sirr deyil ki, AZAL-ın müdafiəsinin cinahları ilə bağlı böyük problemi var. Bu, artıq hamıya məlumdu. Üstəlik, son oyunumuzda iki müdafiəçimiz əvəzedici komandaya göndərilmişdi. Bu üzdən onlar da bizə kömək edə bilmirdilər. Amma biz müdafiədəki çatışmazlıqlar üzərində çalışırıq. Hücum futbolu sərgiləməyə çalışırıq. Baxmayaraq ki, “Bakı” ilə oyunda bu, o qədər də alınmadı. Stadion da bizə kömək etmədi. Qazon çox pis idi. Hər halda mərkəzi arenada gedən yenidənqurma işlərindən danışmağa dəyməz”.
Benuahi son oyundakı nəticənin (0:0) ədalətli olduğunu deyir: “Hesab edirəm ki, səfərdə qazanılan 1 xal bizim üçün yaxşı nəticədi. Axı rəqib də sıradan bir komanda deyildi. Oyun bütövlükdə bərabər mübarizə şəraitində keçdi. Demək olmazdı ki, hansısa komanda digərindən yaxşı oynadı. Buna görə də nəticəni qanunauyğun sayıram”.
Yarımmüdafiəçi bəzi futbolçuların alışmadığı mövqelərdə oynamasının da təsirsiz ötüşmədiyini deyir: “İbekoyi ilə Kvirtiya müdafiədə oynayırdılar. Bu, onlar üçün alışıq olmaqdıqları bir mövqedi. Bu, təbii ki, bizim ümumi oyunumuza təsirsiz ötüşmür. Amma hər şeyə rəğmən, biz xal qazana bildik”.
Benuahi, millinin oyunları ilə əlaqədar yaranan boşluğun AZAL-ın işinə yarayacağına inanır: “Bu fasilə bizə böyük fayda gətirəcək. Bu müddət ərzində öz oyunumuzu analiz edə, buraxdığımız səhvləri görə biləcəyik. Kifayət qədər vaxtımız olacaq ki, öz oyunumuzdakı çatışmazlıqları aradan qaldıraq. Bu fasilədən sonra artıq daha yaxşı AZAL görəcəksiz”.
