4 oktyabr 2011 12:01
XL azarkeşləri üstünlüyü əldən vermək istəmir
Futbol üzrə Azərbaycan Premyer Liqasında geridə qalan 8 turu ərzində 47 qarşılaşma keçirilib. Azerisport.az xəbər verir ki, yalnız 1-ci turun “Neftçi” – “Qarabağ” qarşılaşması təxirə salınıb. Sentyabr ayı ərzində baş tutan 25 qarşılaşmada stadionlara 81070 azarkeş gəlib.
Ötən ay olduğu kimi sentyabr ayında da ən çox azarkeş Gəncə şəhər stadionunda qeydə alınıb. Premyer Liqanın 5-ci turunda yerli “Kəpəz”in doğma meydanda AZAL-ı 3:1 hesabı ilə məğlub etdiyi qarşılaşmanı 15000 azarkeş izləyib. Ən az azarkeş isə 5-ci turun “Bakı” - “Rəvan”, 6-cı turun “Rəvan” - “Sumqayıt Şəhər” və 8-ci turun “Qarabağ” - “Turan” qarşılaşmalarında qeydə alınıb – 300 nəfər.
Azarkeşlərinin çoxluğuyla yenə əyalət klubları öyünə bilər. Belə ki, sentyabrda “Xəzər Lənkəran”ın ev oyunlarını 25 000, “Kəpəz”in ev oyunlarını isə 20 000 azarkeş stadiondan canlı izləyib. Sentyabr ayı ərzində bütün paytaxt təmsilçilərinin oyunlarına isə cəmi 12720 azarkeş gəlib.
Azarkeşlərin daha çox marağına səbəb olan oyunlar isə cari mövsümün 5-ci turuna təsadüf edib – 36950 nəfər. 6-cı turda 11300, 7-ci turda 15900, 8-ci turda isə 14920 azarkeş oyunları stadiondan izləyib. Sentyabrda orta hesabla hər oyunu 3242 nəfər canlı izləyib. Qeyd edək ki, avqust ayı üçün müvafiq göstərici 3581 nəfər olmuşdu. Ümumilikdə, Premyer Liqanın ötən 8 turunun oyunlarını 159870 azarkeş stadionlardan canlı izləyib. (PFL)
