7 oktyabr 2011 00:00
Runinin atası danışılmış oyunlarla bağlı həbs olundu
“Manchester United” klubunun və İngiltərə millisinin hücumçusu Ueyn Runinin atası danışılmış oyunlarla bağlı istintaq çərçivəsində həbs edilib. Azerisport.az xəbər verir ki, oğlu ilə eyni adı daşıyan 48 yaşlı Runi və 54 yaşlı qardaşı Riçi 2010-cu il dekabrın 14-də Şotlandiya çempionatında keçirilən şübhəli “Motherwell” – “Hearts” qarşılaşması ilə əlaqədar aparılan cinayət işi üzrə saxlanılıblar. İş üzrə ümumilikdə 9 nəfər həbs olunub.
Xatırladaq ki, “Motherwell” – “Hearts” matçı 1:2 hesabı ilə qonaqların xeyrinə nəticələnib. “Hearts”ın qollarından biri penaltidən vurulub. “Motherwell”in oyunçusu Stiv Yenninqs 82-ci dəqiqədə qırmızı vərəqə alaraq meydandan qovulub. Oyun keçirilən gün Liverpulda bir nəfər “Motherwell”in bir oyunçusunun qırmızı vərəqə alacağı ilə bağlı ayrı-ayrılıqda hər biri 100 sterlinq olmaqla iki “stavka” qoyub. Eyni şəxs bir qədər sonra daha iri “stavka”lar qoymaq istəyib, lakin mərc şirkətinin onlayn təhlükəsizlik sistemi bu şübhəli “stavka”ları qəbul etməyib. Mərc şirkəti polisə müraciət etdikdən sonra polis təhqiqata başlayıb.
Qeyd edək ki, matçda qırmızı vərəqə alan S. Cenninqs də həbs olunanlar arasındadı.
