8 oktyabr 2011 13:58
“Əsas rəqiblərimiz XL-la Neftçidi”
Ağdamın "Qarabağ" klubu "Rəvan"la oyunun hazırlıqlarını davam etdirir. Azerisport.az xəbər verir ki, komanda milli oyunlar səbəbindən tam heyətlə çalışa bilməsə də, Albaniya yığmasının heyətində son oyununda qırmızı vərəqə alaraq cəzalı duruma düşən Ansi Aqolli artıq Bakıya qayıdıb və komandayla məşqlərə çıxıb.
Azərbaycana gələn ən uğurlu legionerlərdən sayılan 29 yaşlı sol cinah müdafiəçisi stabilliyi ilə yanaşı, daim hücumlara qoşulmağı ilə yadda qalır. Ansi "Turan"la baş tutan sonuncu oyunda "Qarabağ"ın 2-ci qolunu vuraraq Premyer Liqada qol hesabını açdı.
Albaniyalı futbolçu klubun rəsmi saytına verdiyi açıqlamada ilk olaraq bunu dəyərləndirib: "Hə, hücumlara qoşulmağı sevirəm. Bilirdim ki, əvvəl-axır qol vuracaqdım (gülür). Ötən mövsüm səhv etmirəmsə 5 qol ötürməsi vermişdim. "Qarabağ"ın oyun üslubu elədi ki, daim hücuma dəstək verirəm. Topla daha çox davranırıq. İnanıram ki, bu, vuracağım sonuncu qol olmayacaq. Meydan düz olanda biz daha yaxşı oynayırıq. Getdikcə, daha yaxşı oynayacağımıza inanıram".
Ansi Premyer Liqada hədəfləri və rəqiblər haqda da danışıb: "Təbii ki, maksimalist olaraq çempionluq istəyirəm. Komandamızın buna qadir olduğuna əminəm. Sadəcə, hər oyuna final matçı kimi baxmalıyıq. Xüsusilə, milli oyunlardan sonrakı periodu yaxşı dəyərləndirməliyik. Çox vaxt həmin matçlardan sonra xal itiririk. Bəxt amili də vacibdir. Xal itirdiyimiz "Qəbələ", "Xəzər Lənkəran" və "Sumqayıt Şəhər"lə oyunlarda rəqibdən daha yaxşı təsir bağışlamışdıq.
Sadəcə, şanssızlıqla üzləşdik. Çempionluğa əsas namizədə gəlincə, "Xəzər Lənkəran" bu gün lider mövqeyində qərarlaşıbsa, demək onlar hər kəsdən öndədirlər. Amma keçən il daha gerilərdən gəlib rəqibi yaxalamışdıq. Ona görə də "Qarabağ" olaraq yenə də zirvəyə qalxa bilərik. Zənnimcə, qızıl medallar uğrunda əsas rəqiblərimiz "Xəzər Lənkəran" və "Neftçi"di. Amma digər oyunlara da eyni konsentrasiya ilə yanaşmasaq, əsas rəqibləri fikirləşməyin mənası yoxdu".
