10 oktyabr 2011 16:50
Foqts: Nə qədər ki, baş məşqçiyəm, Vaqif yığmaya çağırılmayacaq
Futbol üzrə yığma komandamızın baş məşqçisi Berti Foqts bu gün mətbuat konfransı keçirib. Azerisport.az xəbər verir ki, o, sabah keçiriləcək Türkiyə ilə oyun öncəsi bunları dilə gətirib:
“Mən Türkiyədə belə komandaya qarşı oynayacağımız üçün çox şadam. Bu, böyük şərəfdi. Hesab edirəm ki, Türkiyə Azərbaycan üçün böyük nümunədi. Təəssüf ki, bizim bəzi problemlərimiz var. Avstriya ilə son oyunda 70 dəqiqə azlıqda oynadıq və nəticədə məğlub olduq. Amma oyunçularımızın durumu yaxşıdı”.
“Mən Türkiyədə belə komandaya qarşı oynayacağımız üçün çox şadam. Bu, böyük şərəfdi. Hesab edirəm ki, Türkiyə Azərbaycan üçün böyük nümunədi. Təəssüf ki, bizim bəzi problemlərimiz var. Avstriya ilə son oyunda 70 dəqiqə azlıqda oynadıq və nəticədə məğlub olduq. Amma oyunçularımızın durumu yaxşıdı”.
Almaniyalı həmçinin qısa zaman kəsiyində ardıcıl oyun keçirməyin də yığmamız üçün çətin olduğunu vurğulayıb: “Azərbaycan çempionatında böyük problem var. Biz 3-4 gündən bir oynamağı bacarmırıq. Amma komandam futbol oynamağı bacarır. Sadəcə, oyunumuz o qədər də sürətli alınmır”.
Problemlərdən danışarkən, Foqts bunları dilə gətirib: “Hazırda əsas hücumçumuz Rauf Əliyev komandada yoxdu ki, bu da bizim üçün çox pisdi. Biz başa düşməliyik ki, Türkiyə də təzyiq altında oynayacaq”.
Vaqif Cavadovla bağlı yaranan qalmaqal da yaddan çıxmadı: “Vaqif öz komandasına, öz ölkəsinə kömək etmədi. Nə qədər ki, mən baş məşqçiyəm, o, yığmada olmayacaq. Bu, bir-iki matç da ola bilər, dörd il də. Amma Vaqif dəqiq yığmada olmayacaq”.
Lakin hər şeyə rəğmən, Foqts yığmamızın sona kimi mübarizə aparmaq gücündə olduğunu deyir: “Biz burda göstərmək istəyirik ki, qardaş ölkə yığması da bizim necə inkişaf etdiyimizi görsün. Əgər bütün oyunboyu müdafiə olunsaq, heç nəyə nail ola bilməyəcəyik. Hücum etmək lazımdı. Ən azı ona görə ki, bizim itiriləsi heç nəyimiz yoxdu. Türklər isə təzyiq altındadılar. Türkiyənin zəif cəhəti yoxdu. Bakıda onlar onca dəqiqə arxayınlaşdılar və biz qol vurduq. Heyəti artıq müəyyənləşdirmişəm. Amma deməyəcəm. Sadəcə onu deyə bilərəm ki, Raufla Vaqif hücumda olmayacaq”.
