15 oktyabr 2011 14:01
Qarabağ üçün 3 bəd, 1 xoş xəbər
“Qarabağ” “Rəvan”la oyuna hazırdı. Azerisport.az xəbər verir ki, 2 həftəlik fasilədən sonra start götürən Premyer Liqada debütantla qarşılaşacaq bu komanda hazırlıqlarını tamamlayaraq oyun saatını gözləyir.
Bu gün ağdamlılar oyunöncəsi yüngül çalışma keçəcək. Matçın keçiriləcəyi “Dalğa Arena”da 1 saat tər tökəcək “Qarabağ”ın üzvləri ardınca oteldə məskunlaşacaq.
“Sarı-qırmızılar”la oyunöncəsi komandada 3 itki var. Emin İmaməliyevin dekabra qədər sıradan çıxdığı məlum idisə, U-21-in Belçikayla oyununda zədələnən Qara Qarayevlə yanaşı son məşqdə əzələsi dartılan Nderim Nedzipi də “Rəvan”a qarşı oyunda forma geyinməyəcək.
Əvəzində Premyer Liqada keçirdiyi ilk oyunda sıradan çıxan Zaur Həşimov tam sağalaraq meydana çıxmağa hazırdı.
Xatırladaq ki, “Rəvan” – “Qarabağ” oyunu 16 oktyabrda saat 17:00-da Mərdəkanda, “Dalğa Arena”da keçiriləcək.
