15 oktyabr 2011 00:12
İnter – Neftçi üçün arzuolunmaz rəqib
Bazar günü Premyer Liqanın 9-cu turunun mərkəzi oyununda “İnter” və “Neftçi” üz-üzə gələcək. Azerisport.az bu klublar arasındakı paytaxt derbiləri ilə bağlı bəzi statistik məqamlarla sizi də tanış edir.
Qeyd edək ki, bu komandalar ilk dəfə 2004-cü ildə görüşüblər. Komandalar arasında ilk oyun “İnter”in 2:1 qələbəsilə başa çatıb. Komandaların qarşılaşmasında ilk qolun müəllifi “İnter”in indiki kapitanı Vladimir Levin olub.
Bütövlükdə isə, bu komandalar 24 dəfə üz-üzə gəliblər. Bu qarşılaşmaların 8-də “İnter”, 6-da isə “Neftçi” sevinib, 10 matç da heç-heçə başa çatıb. Vurulmuş qollar arasında fərq 22-21 “bankirlər”in xeyrinədi.
Azərbaycan çempionatı çərçivəsində “İnter” 9 dəfə “Neftçi”ylə səfərdə oynayıb. Bu qarşılaşmalardan 3-də meydan sahibləri, 2 dəfə qonaqlar qalib gəlib. 4 oyunda isə qalib müəyyənləşməyib.
Qeyd edək ki, “İnter” - “Neftçi” qarşılaşmasının tarixində ən böyük hesab 3:0. Belə hesabla “İnter” 2009-2010-cu il mövsümündə kubok oyunu çərçivəsində keçirilən səfər oyununda “Neftçi”ni yenib. Sözügedən paytaxt derbisində ən populyar nəticə isə 1:0 və 1:1-dir. Belə nəticə 24 qarşılaşmanın 10-da hərəsi 5 dəfə olmaqla qeydə alınıb.
