17 oktyabr 2011 02:08
Millimizin üzvü Türkiyə Superliqasında növbəti matçına çıxdı
Məlum olduğu kimi, həftəsonu Türkiyə Superliqasında 6-cı turun görüşləri keçirilib. Azerisport.az xəbər verir ki, 21 yaşlılardan ibarət Azərbaycan milli komandasının (U-21) üzvü Cihan Özkara da son turda meydana çıxmaq imkanı qazanıb.
Belə ki, o, şərəfini qoruduğu “Sivasspor”un heyətində səfərdə “Gaziantepspor”la qarşılaşıb. Millimizin üzvü start heyətində meydana çıxmasa da, fasilədən dərhal sonra – 46-cı dəqiqədə baş məşqçi Cihanı da döyüşə atıb.
Amma tərəflərin səylərinə baxmayaraq, matç elə başladığı kimi də başa çatıb - 0:0. Özkara bir neçə əlverişli vəziyyət yaxalasa da, fərqlənə bilməyib.
