19 oktyabr 2011 13:25
AFFA Vaqif Cavadovu cəzalandırdı
Bu gün AFFA İntizam Komitəsinin növbəti iclası keçirilib. Azerisport.az xəbər verir ki, iclasda bir müddət öncə yığmadan imtina edən Vaqif Cavadovun məsələsinə baxılıb.
Aparılan müzakirələrdən sonra aşağıdakı qərarlar çıxarılıb:
Azərbaycan “A” milli komandasının baş inzibatçısı İslam Abbasovun İntizam Komitəsinə təqdim etdiyi məlumata əsasən qərara alınır:
1. Vaqif Cavadov 1 (bir) il müddətinə Azərbaycan milli komandasının heyətindən kənarlaşdırılsın (AFFA-nın İntizam Komitəsinin Əsasnaməsi, maddə 2, bənd 2,4).
2. Vaqif Cavadov Azərbaycan Premyer Liqasında çıxış edəcəyi təqdirdə, AFFA-nın İntizam qaydalarına uyğun olaraq, 5 təqvim oyunundan kənarlaşdırılsın, klubu isə 5000 (beş min) manat cərimə olunsun (maddə 79).
3. Milli komandanın əvvəlcədən planlaşdırılan seleksiya xarakterli toplanışına dəvət olunan Rəşad Abdullayev toplanış vaxtı millinin baş məşqçisinə müraciət edərək toplanışda iştirak etmək istəmədiyini bildirib. Buna görə futbolçunun bu hərəkəti ilə bağlı “Neftçi” klubunun rəhbərliyinə məktub ünvanlansın (AFFA-nın İntizam Komitəsinin Əsasnaməsi, maddə 2, bənd 2,4).
Qeyd: Vaqif Cavadovun milli komandada çıxış etməsi ilə bağlı məsələyə millinin baş məşqçisinin müraciəti əsasında yenidən baxıla bilər.
