19 oktyabr 2011 11:54
Qəbələ CNN-nin diqqət mərkəzində
Azərbaycan Gənclər və Turizm Nazirliyinin dəvətilə Amerikanın “CNN International” telekanalının əməkdaşları ölkəmizə gəliblər. Azerisport.az xəbər verir ki, dünyanın 200-dən artıq dövlətində verilişlərini yayınlayan telekanalın işçi qrupunun səfərində məqsəd respublikamız haqqında “Eye On Azerbaijan“ (Azərbaycana baxış) adlı silsilə proqram hazırlamaqdı.
CNN-nin xüsusi layihəsi olan bu proqram, adətən, hər dəfə bir ölkəyə həsr edilərək, həmin ölkənin mədəniyyəti, tarixi, incəsənəti və idmanı haqqında dünya tamaşaçılarına maraqlı məlumat verir. CNN bu dəfə Azərbaycanı seçib.
“Eye On Azerbaijan“ proqramının idman bölümündə “Qəbələ” Futbol Klubu haqqında danışılacaq. Bu məqsədlə oktyabrın 16-da Qəbələdə olan məşhur telekanalın çəkiliş qrupunun üzvləri komandanın baş məşqçisi Toni Adamsla görüşüb, ondan müsahibə alıblar. Daha sonra qonaqlar “Qəbələ” – “Kəpəz” matçını izləyiblər. CNN əməkdaşları həmçinin Qəbələ stadionunda, komandanın bazasında olub, süjetlər hazırlayıblar.
