20 oktyabr 2011 14:32
“Mən heç vaxt millidən imtina etməmişəm”
"Neftçi"nin futbolçusu Rəşad Abdullayev klubun rəsmi saytına açıqlama verib. Azerisport.az xəbər verir ki, təcrübəli yarımmüdafiəçi bu ilin avqust ayında Azərbaycan milli komandasına dəvət olunması ilə bağlı fikirlərini bildirib.
"Mən heç vaxt milli komandadan imtina etməmişəm. Bir müddət əvvəl Berti Foqtsdan milli komandanın seleksiya xarakterli məşqinə dəvət aldım. Təyin olunmuş vaxtda yığmanın düşərgəsinə yollandım. Lakin baş məşqçiyə zədəli olduğumu deyərək, buna görə də həmin toplanışdan azad olunmağımı xahiş etdim. Bütün bunlardan təbii ki, AFFA və "Neftçi" rəhbərliyinin də xəbəri oldu. Yenə deyirəm, mən heç vaxt milli komandadan imtina etməmişəm. Yığmada oynamaq hər bir futbolçunun arzusudu. Həmişə millidə oynamağa hazıram. Bu, mənim üçün böyük şərəfdi" - deyə Abdullayev vurğulayıb.
