21 oktyabr 2011 19:32
“Bunu bizdən turnir cədvəli tələb edir”
“İnter”in braziliyalı müdafiəçisi Danildo Assioli Premyer Liqanın 10-cu turunun “Qəbələ” ilə oyunu öncəsi fikirlərini bildirib. Azerisport.az xəbər verir ki, o, klubun rəsmi saytına müsahibəsində bunları dilə gətirib:
- Bu oyun bizim üçün çox vacibdi. Biz yaxşı surət götürmüşük, iki lideri məğlub edərək mövqelərimizi gücləndirmişik. İndi bizə bu üstünlüyü qorumaq və “Xəzər Lənkəran”ı çox da irəliyə buraxmamaq lazımdı. Bizi çox çətin oyun gözləyir və “Qəbələ”ni məğlub etmək üçün maksimum çalışmalıyıq.
- Çox güman ki, “Qəbələ”nin tipik ingilis futbolu sərgiləyən oyun tərzilə tanışsan...
- Bəli, biz rəqibin oyununu diqqətlə öyrənmişik. “Qəbələ” uzun ötürmələrlə oynamağı xoşlayır, onlar standart vəziyyətləri təhlükəli yerinə yetirirlər, xüsusilə də aut atışları uğurlu alınır. Buna görə də, bütün oyun ərzində diqqqətli olmalıyıq.
- Bundan başqa, bu matçı iki məşqçi - Kaxaber Tsxadadze ilə Toni Adamsın qarşılaşması da adlandırmaq olar...
- Bəli, fikrimcə, hər ikisi Azərbaycanda fəaliyyət göstərən ən yüksək səviyyəli məşqçilərdəndi. Düşünürəm ki, hər iki məşqçi diqqətlə bir-birilərini öyrəniblər. Zənnimcə, bu qarşılaşmanın qalibi daha az səhv buraxan tərəf olacaq.
- Matçla bağlı proqnoz verə bilərsən?
- Biz meydana yalnız qələbə üçün çıxacağıq - bunu bizdən turnir cədvəli tələb edir. “İnter” bu oyuna yaxşı hazırlaşıb, bizə isə düşünənləri həyata keçirmək və baş məşqçinin tapşırıqlarını düzgün şəkildə yerinə yetirmək lazımdır.
