21 oktyabr 2011 11:47
10-cu tur: Əfqan Talıbovun proqnozu
Azərbaycan veteran futbolçusu Əfqan Talıbov azerisport.az saytı üçün Premyer Liqanın 10-cu turunun oyunlarına proqnozlarını açıqlayıb. Həmin proqnozlarla sizi də tanış edirik.
Bakı – Xəzər Lənkəran
Gərgin oyun olacaq. “Xəzər Lənkəran”ın xal ehtiyatı daha yaxşıdı. Hər iki komanda görüşə ehtiyatlı başlayacaq. İlk növbədə uduzmamağa çalışacaqlar. Bu görüşdə hər şeyi bir qol həll edəcək. Fikrimcə, bu qolu da “Bakı” vuracaq və nəticədə qələbə qazanacaq.
Simurq – Qarabağ
Hər iki komanda son turda xal itirib. Buna baxmayaraq, Zaqatala klubunun oyununu qeyd etməmək olmazı. Turdan-tura “Simurq”a qarşı oynamaq çətinləşir. Amma ustalıq səviyyəsinə və anlaşma baxımından onlar “Qarabağ”dan geri qalırlar. “Qarabağ” elə səviyyədədi ki, “Rəvan”la bir heç-heçə onları ruhdan sala bilməz. Qurban Qurbanovun komandası 2:0 qalib gələcək.
Kəpəz – Neftçi
Gəncədə bakılılar çətin olacaq. Bu komandalar arasındakı oyunlar həmişə prinsipiallığıyla seçilib. Meydan sahibləri həmişə evdə güclü oynayırlar. “İnter”ə yenilgidən sonra “Neftçi”nin yenidən xal itirmək fikri yoxdu. Əminəm ki, heç-heçə də onları qane edəcək. Şansların 60-ın 40-a “Neftçi”nin xeyrinə olduğunu düşünürəm.
AZAL – Rəvan
Prinsipial oyun olacaq. Vladislav Qədirovun gəlişindən sonra artıq komanda məğlubiyyət tanımır. Yəqin ki, debütant uğurlu çıxışını davam etdirmək istəyir. AZAL-da isə gərgin ab-hava hökm sürür. Komanda mövsümə heç də yaxşı başlamayıb və sabir oyun sərgiləmir. “Rəvan”ı yenmələri də çox çətin olacaq. Heç-heçə olacağını düşünürəm.
Turan – Sumqayıt Şəhər
Hər iki komanda turnir cədvəlinin zirzəmisindədilər. Hər xal onlar üçün qızıla bərabərdi. SŞ gənc komandadı və sona kimi döyüşməyi bacarır. “Turan” da öz meydanında yaxşı çıxış edir. Düşünürəm ki, “Turan” qələbə qazanacaq.
İnter – Qəbələ
“Qəbələ” hələ də “Rəvan”a yenilgini unuda bilmir. Bölgə təmsilçisi xeyli xal itirdi. “İnter” isə ardıcıl olaraq favoritlər üzərindəki qələbələri sayəsində yüksəlişdədi. Yeri gəlmişkən, məhz bu fakt “bankirlər”i arxayınlaşdıra bilər. Az qol olacaq. Məncə, “Qəbələ” qələbə qazanacaq.
