22 oktyabr 2011 14:00
Azərbaycan Fransa və Makedoniya ilə qarşılaşa bilər
Futzal üzrə Azərbaycan yığmasının DÇ-2012-nin əsas mərhələsindəki son rəqibi demək olar ki, müəyyənləşib. Azerisport.az xəbər verir ki, bu, ya Makedoniya, ya da Fransa yığması olacaq.
Məlum olduğu kimi, iyulun 7-də atılan püşkatma zamanı millimizin əsas mərhələdə 5-ci qrupda mübarizə aparacağı müəyyənləşmişdi. O zaman iki rəqibimiz – Ukrayna və Xorvatiya dəqiqləşsə də, bir rəqibimizin də ilkin mərhələnin E qrupunda mübarizə aparan komandalardan ən güclüsünün olacağı məlum oldu.
Artıq ilk mərhələnin oyunları başa çatmaq üzrədi. E qrupunda mübarizə aparan Makedoniya, Fransa, Monteneqro və İsveçrə arasında ilk iki yığma itkisiz irəliləyir. Onların hər ikisi ilk iki oyundan sonra 6 xala malikdi. Sabah keçiriləcək həlledici oyunda məhz Fransa və Makedoniya yığmaları üz-üzə gələcəklər. Fransızlara qrup qalibi olmaq üçün mütləq qələbə lazımdısa, makedonlar heç-heçə ilə də əsas mərhələyə vəsiqəyə sahib çıxa bilər. Məhz qrup qalibi əsas mərhələdə yığmamızın yer aldığı 5-ci qrupdakı komandalarla üz-üzə gəlmək şansına yiyələnəcək.
