23 oktyabr 2011 17:08
“Hakimin ağzından şərab zavodunun iyi gəlirdi”
Sərxoş hakim Çexiya futbolunda qalmaqala səbəb olub. Azerisport.az xəbər verir ki, ölkə çempionatının aşağı liqasında çıxış edən "Jestrabi Lhota" və "Tynec-nad-Labem" klubları arasında keçirilən və 1:1 hesabı ilə başa çatan oyunun hakimi Tomas Fidra meydana sərxoş vəziyyətdə çıxıb.
"Jestrabi Lhota"nın rəsmisi Karel Dusek "Lidove Noviny" qəzetinə açıqlamasında Tomas Fidranın sərxoş olduğunu və 3 futbolçunu heç bir səbəb olmadan meydandan qovduğunu bildirib. Amma qaydalarda hakimin sərxoş olması ilə bağlı maddə olmadığından komandalar meydana yarımçıq tərk etməyərək, oyunu sona qədər davam etdiriblər: "Hakimin ağzından şərab zavodunun iyi gəlirdi. Özü də bir içki məclisindən gəldiyini etiraf etdi".
Hakim oyun ərzində bir neçə dəfə yerə yıxılıb, heç bir məntiqə sığmayan qərarlar qəbul edib. Referi qonaq komandanın üç futbolçusuna heç bir səbəb olmadan qırmızı vərəqə göstərib. Bunu görən meydan sahibləri hücum etməmək qərarına gəliblər və oyunu 1:1 hesabı ilə bitiriblər. Onların bu hərəkəti azarkeşlərin alqışına səbəb olub.
Artıq federasiya oyunun nəticəsi ilə bağlı qərar qəbul edib. Qarşılaşmanın nəticəsi ləğv olunub, Tomas Fidra isə 12 ay müddətinə hakimlikdən uzaqlaşdırılıb.
