25 oktyabr 2011 11:33
Rauf Əliyev: Neftçini yenmək bizə xoş olacaq
“Qarabağ”ın hücumçusu Rauf Əliyev bu gün keçiriləcək Premyer Liqanın 1-ci turundan təxirə salınmış “Neftçi” ilə oyun öncəsi azerisport.az saytının suallarını cavablandırıb.
- “Neftçi” ilə oyundan nə gözləyirsiz?
- Bu komandalar arasındakı oyunlar həmişə gərgin keçib. Belə matçlarda sakitlik olmur. Məlum olduğu kimi, “Qarabağ” və “Neftçi” hazırda ölkənin ən güclü klublarından hesab olunur. Odu ki, hər iki komanda meydana ancaq qələbə üçün çıxacaq. Düşünmürəm ki, bu oyunda çox qol gözləməyə dəyər. Amma hər şey mümkündü. Hər halda hər iki komandanın hücum futbolu oynayacağı dəqiqdi.
- “Neftçi”nin son turda Gəncədə xal itirməsi bu oyuna təsir edə bilər?
- Bizim üçün əsas öz oyunumuzdu. “Neftçi”nin nəticələri bizi narahat etmir. Rəqibin formalaşmış heyəti var. Onlar artıq neçə ildi bir yerdə oynayırlar. Asanca toparlanıb, öz oyunlarını göstərə bilərlər. Heç kim deyə bilməz ki, “Qarabağ”a “Neftçi”ylə oyunda asan olacaq. Amma onları yenmək bizə xoş olacaq. Qələbə üçün hər şeyə hazırıq.
- “Qarabağ”ı bu oyunun favoriti saymaq olar?
- Belə oyunlarda favorit olmur. Biz xal itirmək istəmirik. Düşünürəm ki, rəqibin öz hücumlarını qurmasına mane olmalıyıq, onları mərkəzdə qarşılamalıyıq. “Neftçi”nin hücumçuları çox təhlükəlidilər. Hətta son oyunda fərqlənməsələr də, biz diqqətli olmalıyıq.
- Son zamanlar rəqibinizin əsas hücumçusu Bahodir Nasimov ümumiyyətlə, qol vurmağı unudub...
- Amma mənə elə gəlir ki, biz təhlükəni Bahodir Nasimovdan gözləməliyik. Bu oyunçu çox təhlükəlidi. İstənilən oyunda fərqlənə bilər.
- Lider “Xəzər Lənkəran”la aranızdakı fərq heç də az deyil...
- Son turda lənkəranlılar xal itirdilər. Bu, bir daha göstərdi ki, hələ heç kim ilk altılıqda özünə yeri təmin etməyib. Liderlik də çempionluq deyil. Biz hələ yenicə sürət yığırıq. Fikrimcə, birinci dövrənin sonunda biz daha yüksək mövqedə olacağıq. Əgər hər turda qələbə qazansaq, digər oyunların nəticələri bizim üçün ümumiyyətlə maraqsız olacaq.
- “Qarabağ”ın “Simurq”la son oyunu çox əsəbi alındı?
- “Simyrq” yaxşı komandadı. Mən onları autsayder saymıram. Ola bilsin ki, hələ oyunları alınmır. Amma evdə bu komanda həmişə yaxşı futbol sərgiləyir. Heç bir komanda onları səfərdə asanlıqla yenə bilməz.
