25 oktyabr 2011 13:00
AFFA daha bir hakim səhvi aşkarladı, Bakını ciddi sanksiya ilə hədələdi
Bu gün AFFA İntizam Komitəsinin növbəti iclası keçirilib. Azerisport.az xəbər verir ki, aparılan müzakirələrdən sonra Premyer Liqanın 10-cu turunun oyunları ilə bağlı aşağıdakı qərarlar çıxarılıb:
“Bakı”– “Xəzər Lənkəran” matçının 73-cü dəqiqəsində “Bakı”nın futbolçusu Cəmşid Məhərrəmov kobud oyuna görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub. Oyunun 90+3-cü dəqiqəsində “Xəzər Lənkəran”ın futbolçusu Alim Qurbanov kobud oyuna görə ikinci sarı vərəqə alaraq meydandan kənarlaşdırıldığı üçün 1 oyunluq cəzalanıb, klubu 200 manat cərimə olunub. Matçın 65 və 90+3-cü dəqiqəsində “Bakı”nın azarkeşləri tərəfindən meydançaya kənar əşya atıldığı üçün klub 2000 manat cərimə olunub. Oyunun 83-cü dəqiqəsində “Bakı”nın məşqçisi Novruz Əzimov texniki zonadan kənarlaşdırıldığı üçün 1 oyunluq cəzalanıb, klubu 1000 manat cərimə olunub. Matçda Premyer Liqanın himni ifa olunmadığı üçün “Bakı”ya xəbərdarlıq edilib. Analoji hadisənin təkrarlanacağı təqdirdə kluba qarşı daha ciddi sanksiyalar tətbiq olunacaq. Stadionda “Xəzər Lənkəran”ın azarkeşləri yerləşən sektorda azarkeşlər tərəfindən 4 ədəd oturacaq sındırılıb. Bu səbəbdən “Xəzər Lənkəran” dəymiş zərərə uyğun olaraq “Bakı”nın təqdim edəcəyi hesab əsasında ödəmə etsin.
“Kəpəz” – “Neftçi” matçının 90+3-cü dəqiqəsində “Kəpəz”in azarkeşləri tərəfindən meydançaya kənar əşya atıldığı üçün klub 2000 manat cərimə olunub.
AZAL – “Rəvan” matçında “Rəvan”ın 6 futbolçusu sarı vərəqə ilə cəzalandığı üçün klub 1000 manat cərimə olunub. Matçın 60-cı dəqiqəsində “Rəvan”ın futbolçusu Con Peluya simulyasiyaya görə sarı vərəqə göstərilib. Lakin matçın video yazısını izlədikdən sonra adıçəkilən futbolçuya qarşı kobud oynanıldığı və hakimin qərarının yalnış olduğu aşkar edilib. Bu səbəbdən də futbolçuya göstərilən sarı vərəqə ləğv edilib.
“Turan” – “Sumqayıt Şəhər” matçında “Turan”ın 4 futbolçusu sarı vərəqə ilə cəzalandığı üçün klub 1000 manat cərimə olunub.
